युवक रिपाइंचे नगरपालिकेच्या मदतीसाठी भीकमांगो आंदोलन… पत्रक काढुन मदत करण्याचे केले आवाहन…!

मनमाड(प्रतिनिधी):- मनमाड नगर पालिकेची आर्थिक परिस्थिती खालावली असुन पालिकेच्या तिजोरीत सर्वसामान्य जनता तसेच शहरातील दलित वस्त्यांमध्ये काम करण्यासाठी पैसे नाहीत यासाठी मनमाड नगर पालिकेला आर्थिक मदत करा अशा आशयाचे पत्रक रिपब्लिकन पक्षाचे युवक तालुकाध्यक्ष गुरुकुमार निकाळे यांनी काढले असुन तसे आवाहन केले आहे आणि सोमवारी नगर पालिकेच्या प्रवेशद्वारासमोर भीक मांगो आंदोलन करून जमा झालेले पैसे मनमाड नगर पालिकेचे मुख्याधिकारी शेषराव चौधरी यांना देणार असल्याचे निकाळे यांनी सांगितले आहे.या आवाहन आणि पॉम्प्लेटची मात्र शहरात जोरदार चर्चा सुरू आहे.

               याबाबत सविस्तर माहिती अशी की गेल्या महिन्यात 13 जानेवारी रोजी मनमाड शहरात असलेल्या भारतरत्न डॉ बाबासाहेब आंबेडकर चौकात असलेल्या सार्वजनिक कूपनलिका अर्थात हॅन्डपंप दुरुस्ती करावी यासाठी पत्रक देण्यात आले होते याबाबत मुख्याधिकारी शेषराव चौधरी यांच्याशीही संवाद साधला होता आज करतो उद्या करतो असे म्हणत मुख्याधिकारी यांनी महिना उलटवला मात्र काम केले नाही दलित वस्त्यांमध्ये मुद्दाम काम करत नसल्याचा आम्हाला संशय आहे किंवा पालिकेची परिस्थिती हलाकीची झाली असेल म्हणून आम्ही हे पत्रक काढून तसेच भीक मांगो आंदोलन करून पालिकेला निधी उपलब्ध करून देण्याचा प्रयत्न करत आहोत असे निकाळे यांनी सांगितले आहे.